英超 朗尼勢離曼聯:若留英超隻返愛華頓 

2017053115:18
曼聯成功贏取歐霸盃成雙冠王,來屆將重返歐聯,可謂度過一個成功球季。但對朗尼嚟講,就百般滋味在心頭;雖然戴上隊長臂章捧起歐霸盃,但佢深明「要決定前途」,向記者表示將於未來數周決定來季去向。雖然冇講明走硬,但朗尼表明想多啲時間落場,會同家人商量去向,又表示得到多間英超及外地球會青睞。如果留喺英超,就隻會重返愛華頓。一切一切,都表示佢13年嘅紅魔生涯即將終結。

歐霸盃決賽對阿積士,朗尼到90分鐘才後備落場,當時曼聯已領先2:0。賽後佢捧起歐霸盃,神情係興奮,但佢點會唔知自己早已再唔係球隊主力?當記者問到究竟決定咗來季去向未,佢話:「唔多唔少已經有決定。我收到好多斟介,有英超球會又有海外球會,我係時候要決定。我曾踢過兩間英超球會(母會愛華頓及曼聯),未來唔會出現第三間。」

佢好明白依家喺曼聯嘅位置:「我一直都以球會行先,今季我從未沮喪過,因為我理解莫連奴嘅作法(將佢貶為後備),對曼聯係好事。當然,每個球員都希望落場,如果我喺較年輕嘅時候遇到呢個情況,我會好唔開心,但我依家會尊重領隊嘅決定。其實喺近18個月,我喺球會嘅定位已不停有改變,無論是去是留,我知係時候做決定。」

中超球會對佢有興趣,係眾所周知嘅事實,但朗尼咁講:「對於未來,我隻會考慮足球因素。未來數周我會同家人詳細研究,有結果我就會畀所有人知道。」

東網體育同你追實體壇每個精彩時刻! 
http://bit.ly/2ecTF2A  
原文地址:http://hk.on.cc/hk/bkn/cnt/sport/20170526/bkn-20170526060326171-0526_00882_001.html